母女對談摘錄

今天晚上，齊坐梳化看電視劇〈同事三分親〉。又是黃腳立出場，那副奴才相......
我：「真係想一巴車埋去。」
幾乎同一時間......
媽咪：「真係想冚佢幾巴。」

--------------------------------------------------------------------------
18/5，第三針局部化療後第三天。爸爸不在，梳化上、電視前......
我：「打針前驗血，AFP去到3萬幾......」
沉默。
媽咪：「唉......點解......」
忍不住了，真情流露，我：「媽咪，其實真係賺咗啦......上年本來我可能連做手術嘅機會都無，本來無0架喇......真係賺咗喇......」
忍住淚水，良久良久，我才再吐出一句：「......起碼因為咁，我親耳聽到你講『你係我寶貝』丫......」
竟然在我真情流露時，媽咪來一句：「咩呀？」
......... (oh my God... 又要講多次呀？）
極力鎮靜自己，我再重覆一次。
動容了，好久，媽咪才拼出一句：「......我真係唔甘心......」
.........

(我仍很感恩，有機會讓媽咪多聽我心境。從文靜口中，我知道她很想知道我心裡怎樣想。)

--------------------------------------------------------------------------
數月前......
媽咪：「呀！我要學電腦！等我退休啦，我就去學！」
我：(...................沉默) 心想：「千祈唔好答，千祈唔好答......」

數星期前......
媽咪：「我遲啲去學電腦先，網上有好多資料可以睇。」
我：(...................沉默) 心想：「千祈唔好答，千祈唔好答......」

今天晚上......剛巧電視又播寬頻廣告。
媽咪：「等我遲啲啦，遲啲一定要去學電腦！網上有好多資料。」
我：(...................沉默) 心想：「千祈唔好答，千祈唔好答......」
媽咪：「遲啲買部電腦返嚟。」
我：(噫？今次醒目喎）
媽咪轉頭問我：「咁第時兩部電腦，得一條線，點上網呀？」
知道媽咪肯放過打我部 notebook 的主意，我就好樂意答了：「哦，好簡單，買個router返嚟，我同你齊齊無線上網。」

對於媽咪的聰明智慧，我從來無懷疑。她說要做到的，從來都一定會做到。有時想，為什麼我少時像爸爸，長大了，卻愈來愈像媽媽呢？