decoding

記得大學時代，阿豬曾說老豆表達愛的方法，是急口令爆出一串很粗的潮州粗口。簡單來說，每當老豆爆粗時，建議 decode 的方法是這樣：
「你個衰 xyzabc#$$*!)*#」decode →「仔呀，我好愛你呀！」

我也在學習如何 decode 父母的表達。

Case 1
爸爸說：「醫生呀，如果做化療，係咪可以加錢買一隻貴啲嘅止嘔藥？」x N次
錯誤 decoding
聽見爸爸又問這個醫生早已答了N次的問題，不由得一句頂回去：「醫生都話咗做局部化療唔會嘔咯！」
正確 decoding
「醫生呀，我好擔心個女做局部化療會辛苦，只要佢唔駛嘔，我多多錢都肯俾！」

Case 2

媽媽說：「你問下黃教授，係咪真係唔食得片仔癀？」x N次
錯誤 decoding
心想：「黃教授咪解釋過個原理幾次囉，有無聽嘢0架......解釋完一次就唔好再問啦！」
就嚟無氣，答：「黃教授咪講咗片仔癀裡面有麋香，局部化療要塞住啲化療藥，麋香係活血0架，食咗咪等如無打過針？」
正確 decoding
「我無嘢可以幫到你，我完全控制唔到你病情，我唔知點算！」好明顯，每當驗血結果 AFP節節上升，媽媽就會慌了手腳，在無能為力中總想用盡方法抓緊一點什麼，增加一點掌控感和貢獻感，減低無力感和愧疚感。

Case 3
媽媽說：「乜真係唔食得牛肉咩？」x N次
錯誤 decoding
心想：「靠害？想我死快啲？都話咗唔食得，係咪要黃教授隔一個月提一次？講咗個原理就自己醒目啦！」
差點沒翻白眼，口說：「......」沒有回應，簡直不屑回應。
正確 decoding
Well... 我都不太懂得 decode，或許，媽媽沒有我想得那麼快那麼遠吧，但是，無理由丫，她一向深謀遠慮，那......為什麼？

Case 4
媽媽說：「食唔食榴槤呀？」x 2-3次
錯誤 decoding
心想：「仲嚟引我？你唔係想保護我、唔係想我好返咩？個肝已經好熱喇，仲去撥火？點好返呀？」
口說：「唔，食。」
正確 decoding
Umm... 不懂 decode。

Case 5
媽媽說：「你唔可以再瘦落去喇！」x N次
錯誤 decoding
心想：「肥又話人肥，瘦又話人瘦，想點？宜家一直都輕得好平穩，擔心乜嘢呢？何況，我控制唔到0架！」
正確 decoding
「女呀！好擔心你，你要強壯啲，至頂得住化療。」


正確的 decoding，相信不只能促進家庭和諧，在任何關係上，都能用得著。

「你們各人要快快的聽，慢慢的說，慢慢的動怒......」（雅各書1:19下）

decode decode decode......