National Geographic Dinner

昨天晚飯，爸爸去 "反"，我和媽咪撐枱腳。

媽咪突然問：「青海個省會係乜？係咪銀川？我由今朝早諗到宜家都諗唔到。」
「唔係，銀川係寧夏嘅省會。」我繼續夾餸，不為意媽咪突然又「地理癮」起。

媽咪自言自語，一下子由西北跳至東北三省：「黑龍江省會係哈爾濱，吉林省會係吉林......仲有個省呢？」
我不徐不疾接口：「吉林省係有個吉林市，但省會係長春；剩低嗰個係遼寧。」
「呀！係呀係呀，遼寧省會係瀋陽。」我依然繼續夾餸。

媽咪興之所至，一口氣數出：「甘肅係蘭州，新疆係烏魯木齊，西藏係拉薩，內蒙古係呼和浩特，山東係濟南，安徽係合肥，湖北係武漢，江西呢？」當我想接口時，媽咪早已想到了：「南昌！......湖南呢？」「長沙。」「浙江呢？」初時我還以為媽咪在考我中國地理常識，倒真的有點不想（不屑）答，猶記得上次是考我各省簡稱，好似唔知自己個女係做邊行咁（噫？可能真係唔知會有關係喎），不過，這回媽咪似乎是真的想知道，我便一邊咬住口飯一邊回答：「杭州囉。」

「哦係喎！」媽咪完全沒有停下來的意思，直想把 31個省 / 直轄市 / 自治區都數遍：「山西呢？陝西呢？」哈，不是考我，我也有興致了：「山西係太原，陝西係西安。」「係喎，兵馬俑喎呵？河南係鄭州，廣西係桂林......」「南寧先啱。」「四川係重慶......」「唔係呀，重慶變咗直轄市，好耐喇，成都呀。」

媽咪傻笑：「唉，中學讀嘅全部俾返晒先生。」我心想：「嘩，中學讀嘅仲記得。」便讚一讚媽咪：「嘩，媽咪你已經好勁，咁耐都記得咁多！」

好，到我問媽咪了：「江蘇呢？」「上海。」果然！搞不清北京、天津、上海、重慶四個直轄市！我糾正：「上海係直轄市，南京先啱......貴州呢？雲南呢？」媽咪又好醒喎：「貴陽，昆明。」

整頓晚飯，變了溫習中國地理。到最後，我才想起未答媽咪第一個問題：「青海個省會係......西寧。」媽咪哈哈大笑：「係喎！」

好一頓 National Geographic dinner！

--------------------------------------------------------
尚有四個省沒有和媽咪 go through－－河北（石家莊）、福建（福州）、廣東（廣州）和海南（海口）。

--------------------------------------------------------
其實......這篇不是想寫和媽咪之間的軼事，只是想和大家一起認識祖國~ :P

多謝閱讀，相信 31個省 / 市 / 自治區，都應該記得一半喇啩？Heheheeee..........