肝臟重生完畢！

為什麼我會知道？

因為上星期開始，我發現自己自去年 8月手術後，首次增磅。

都說一般肝臟重生需要四個月，8月切除七成肝臟，12月底，便屆四月之期。

這四個月，我足輕了 20磅有多，原因應該是：

1. 眼見自己老鄰居肝仔被切走七成，個胃唔開心，所以 9月全月「半罷工」，唔多肯郁，主人想飲一碗湯都搞 10分鐘。

2. 小腸無啦啦被截一段上肝替補膽仔個位，震驚過度唔識反應，又無梗一截少咗人手，影響營養吸收。

3. 大腸替老友小腸不值，於是怠工，次次消化都求祈交貨，搞到主人食乜瀉乜，一日瀉兩三次，瀉到 10月底中醫插手情況始慢慢有改善。

4. 剩下三成肝仔要生返大，任務艱巨，刻不容緩，肝仔組織有如 New York Cheesecake般實鄭，要長返細胞真箇「粒粒皆辛苦」。胃唔俾主人食嘢，小腸唔肯吸收，大腸又怠工，只好轉移策略，使出殺手鐧「羊毛出自羊身上」－－仲唔打主人身上脂肪主意？（連肌肉都無埋呢至弊，想像到完全無腹肌是怎麼回事嗎？）

5. 身體不只肝仔需要能量，手術後元氣大傷，哀鴻遍野，有如國殤，處處急需救援，爭奪能源戰一觸即發......

奉勸做肝臟切除手術的朋友，手術後兩個半月後才好買新褲，否則必定後悔。兩星期前新買的，兩星期後已不合穿（太寬），到現在我仍為 500大元感到肉痛，好似擲入了浩瀚大海般無聲無息。

這五個多月，我詳細紀錄了自己的體重和體脂率變化。一直都是下降、下降、下降，試過 6天內輕了 6磅，某天站在鏡前不認得自己的身體......因此，突然增磅，只是區區 2磅，我都知道，是肝臟重生完畢了！Hooray~~

又會咁準時四個月就真係四個月嘅？